ᐅᖄᔪᑦ
ᐃᓄᓕᕆᔨᐅᑦᓱᖓ, ᓇᑯᕐᓴᓲᖑᕗᖓ ᐱᓇᓱᐊᕈᓐᓇᑎᑕᐅᒋᐊᒥᒃ ᐋᕐᕿᓱᐃᒐᓱᐊᖃᑕᐅᑎᑕᐅᒋᐊᒥᒃ ᐃᓄᐃᑦ ᓄᓇᓕᖏᑦᑕ ᓱᒃᑯᑎᕐᑕᐅᒍᑎᒋᓯᒪᔭᖏᓐᓂᒃ.
ᐱᒍᓐᓇᕕᓕᒫᕋᓄᑦ ᐊᔪᐃᓐᓇᕋᓱᐊᓲᖑᕗᖓ ᐃᓱᕐᕆᓇᕐᑐᒦᑎᓯᒐᓱᐊᕐᓱᖓ ᐃᓅᓱᑦᑐᓂᒃ ᐃᓄᓐᓂᒃ ᐃᓚᒌᑦᑐᓂᓪᓗ. ᐱᒋᐊᖓᓱᖓ, ᖃᓄᐃᓘᕈᑎᒋᒍᒪᔭᕋᓂᒃ ᐊᑑᑎᒋᐊᖓᓚᐅᔪᔪᖓ ᐊᒻᒪᓗ ᓱᖏᐅᑎᒋᐊᖃᕐᓱᖓ ᐃᓅᖃᑎᒌᓐᓂᑯᑦ ᐱᐅᓯᐅᔪᓄᑦ. ᐃᓄᐃᑦ ᐃᓗᕐᖁᓯᖓᓂᒃ ᐃᓱᒪᕐᖄᓱᖓ ᐱᓇᓱᐊᕐᓂᖃᓲᖑᔪᖓ ᐊᑦᔨᐅᖏᑦᑐᑎᒍᑦ. ᑕᒪᓐᓇ ᐱᕙᓐᓕᓇᕐᑐᐊᓗᒃ, ᓇᒻᒥᓄᑦ ᐊᒻᒪᓗ ᐱᓇᓱᐊᕐᓂᑎᒍᑦ.
ᐱᐅᓂᖓ ᐅᖓᓯᑦᑐᒥ ᐱᓇᓱᐊᕐᑎᐅᓂᐅᑉ ᐅᓄᐊᒥ ᕿᐅᔭᓇᒻᒪᕆᑦᑎᓗᒍ ᑕᑯᓐᓇᐅᔮᕐᓇᓱᓂ ᐊᕐᓴᓂᕐᓂᒃ, ᒪᖃᐃᕝᕕᓃᒍᒥᓇᑦᓱᓂᓗ ᐊᒻᒪᓗ ᓯᓚᒥ ᓱᖃᑦᓯᒍᒥᓇᕐᓱᓂ.
ᓄᓇᕕᒻᒥᐅᓄᑦ ᑐᖓᓱᑦᑎᑕᐅᓲᖑᔪᒍᑦ ᖁᖓᑦᑕᐅᓱᑕ ᐊᒻᒪᓗ ᐅᑎᕋᑦᑕ ᑕᖃᐃᑦᓯᒋᐊᕐᑐᑐᕕᐅᑦᓱᑕ ᑐᖓᓱᑦᑎᑕᐅᒋᐊᓪᓚᓯᒻᒥᓱᑕ “ᐊᓂᕐᕋᕋᕕᑦ ᑐᖓᓱᒋᑦ”-ᓚᔭᐅᑦᓱᑕ. ᐱᔭᕇᕐᕙᓚᑦᓯᐊᓇᕐᑐᖅ ᐅᖃᐅᑎᔭᐅᔪᖃᕋᒥ ᐃᒫᒃ “ᓇᑯᕐᒦᒃ ᖃᓄᓕᒫᖅ ᐃᑲᔪᕐᓯᒪᑦᓯᐊᓱᑎᑦ ᑲᒪᖃᑦᑕᕋᕕᑦ.” ᖃᓪᓗᓈᑦ ᓄᓇᖓᓂ ᑕᐃᒫᒃ ᓇᑯᕐᒦᑕᐅᓪᓚᕆᒋᐊᒥᒃ ᐊᐅᓚᔨᖏᑐᖓ.
ᐅᖃᐅᑎᔭᐅᒐᔭᕐᓂᕈᒪ ᓄᓇᕕᒻᒥ ᐱᓇᓱᐊᕐᓂᐊᓂᕋᑦᑕᐅᓗᖓ ᐋᓐᓂᐊᓯᐅᕐᑎᐅᓗᖓ ᓱᓇᑐᐃᓐᓇᓕᒫᓕᕆᔨᐅᓗᖓ ᐅᑉᐱᕋᔭᕐᓂᖏᑦᑐᖓ.
ᐅᓪᓗᒥ ᑐᖓᓕᖓᓂᒃ ᐊᕐᕌᒍᕐᑐᕆᐊᓯᑦᓱᖓ ᑐᖓᓇᕐᑐᒥ ᑲᑎᖏᓱᔪᐊᒥ, ᑕᕐᕋᒦᓂᐸᐅᖃᑕᑦᓱᓂ ᑯᐸᐃᒃᓂ ᓄᓇᓕᐅᔪᒥ, ᐃᕐᖃᐃᖃᔭᖏᑐᖓ ᐊᓯᐊᓂᒃ ᐱᐅᓂᕐᓴᒥᒃ. ᑕᕐᕋᓕᐊᓯᒍᕕᑦ ᑲᑦᓱᖓᐃᑦᑐᓯᐊᖑᓂᐊᕐᖁᑎᑦ, ᖃᔨᖃᑦᑕᓂᐊᕋᕕᑦ ᐱᐅᔪᓂᒃ ᑕᒪᒃᑯᐊ ᐱᕙᓪᓕᓇᑦᓯᐊᒪᑕ.
ᐊᑦᔨᐅᖏᑦᑑᓱᓂ ᐊᔪᒐᐃᑦᑑᓱᓂᓗ ᓄᓇᒥ ᐱᓇᓱᐊᕐᕕᖃᕐᑐᖓ ᐃᓱᕐᕆᓇᕐᑐᒥ ᐱᐅᔫᑦᓱᓂᓗ. ᓇᑯᕐᐸᑐᖅ “ᓄᓇᑐᐃᓐᓇᓕᐊᕆᐊᒥᒃ” ᐃᓱᒪᑦᓯᐊᓇᕐᓱᓂ ᓂᐸᐅᑦᑑᔪᒧᑦ.
ᐅᕙᓐᓂᒃ ᐃᑲᔪᕐᓯᓯᒪᔪᖅ ᐱᓇᓱᒐᖃᕋᒪ ᐃᓅᓱᑦᑐᓕᕆᓂᕐᒥᒃ ᑕᒫᓂ ᓄᓇᒥ ᐱᕙᓪᓕᖁᑎᑦᓴᓯᐅᕋᓱᐊᕐᓱᖓᓗ.
ᑕᑯᖃᑦᑕᓯᒪᔪᖓ ᐃᓅᓱᑦᑐᓂᒃ ᐃᒻᒥᓂᒃ ᒥᑭᓪᓕᑎᕐᑐᓂᒃ ᓱᓇᐅᖕᖏᓱᑎᒃ, ᓱᓇᐅᔪᕆᖏᓚᐅᕋᓗᐊᕐᓱᑎᒃ ᐱᒍᓐᓇᓯᑦᓯᐊᕙᑦᑐᓂᒃ ᐃᓚᖏᑎᒍᑦ ᐃᓅᓯᕐᒥᒍᑦ. ᐃᓕᓐᓂᐊᓂᕐᒥᒍᓪᓗ ᑲᔪᓯᒍᓐᓇᓕᕐᓱᑎᒃ ᐱᔭᕇᕈᓯᑦᑕᐅᓴᒻᒪᕆᑦᓱᑎᓪᓗ. ᓴᓇᕐᕈᑎᑦᓴᑖᕐᑎᑕᐅᑐᐊᕈᑦᑕ ᐃᓅᓯᖏᓐᓂ ᑕᑯᓐᓇᓯᐊᕈᓐᓇᓯᓂᐊᕐᑐᒍᑦ. ᓂᐱᖃᕐᓂᐊᓕᕋᑦᑕ.
ᐱᓇᓱᒐᕋ ᐊᑦᔨᖃᖏᑐᖅ ᐃᓄᓐᓂᒃ ᖃᓪᓗᓈᓂᓪᓗ ᐊᑕᐅᑦᓯᑯᑦ ᐱᓇᓱᐊᖃᑎᖃᕈᓐᓇᓱᖓ ᐊᑦᔨᒌᖏᑐᓪᓗ ᐱᓇᓱᐊᕐᕕᐅᔪᓂᒃ ᐋᓐᓂᐊᕕᒻᒥ ᖃᓄᐃᖏᓯᐊᕐᓂᓕᕆᓂᕐᒥᓗ.
ᐃᓅᓕᕐᓯᒪᑦᓱᖓ ᐱᕈᕐᓴᓯᒪᑦᓱᖓᓗ ᑰᑦᔪᐊᒥ, ᐃᑲᔪᕐᓯᒪᑦᓯᐊᑐᕆᔪᖓ ᖃᓄᐃᖏᓯᐊᕐᓂᓕᕆᓂᕐᒧᑦ ᐊᑯᓐᓂᒥᐅᑕᐅᑦᓱᖓ ᐊᓯᖏᓐᓄᑦ ᐱᓇᓱᐊᕐᕕᐅᔪᓄᑦ, ᓄᓇᓕᒻᒥ ᓯᕗᓕᕐᑎᐅᔪᓄᑦ ᑎᒥᐅᔪᓄᓪᓗ ᑕᒪᓐᓇ ᐱᕙᓪᓕᓯᐊᕐᓇᑐᖅ ᐱᒻᒪᕆᐅᑦᓱᓂᓗ ᐅᕙᓐᓄᑦ.
ᑐᓚᑦᑕᕕᒻᒥ ᐊᓐᓂᓇᕐᑐᖁᑎᐅᔪᑦ ᐅᕙᓪᓄᑦ ᐃᑉᐱᓇᓪᓚᕆᑦᓯᐊᑐᑦ ᐃᓗᕐᖁᓯᕐᒨᓕᖓᔪᑦ ᐃᑉᐱᒋᑦᓱᒋᑦ ᐱᒍᑦᔨᒍᑕᐅᓲᖑᒻᒪᑕ. ᐅᕙᓪᓄᑦ ᐱᒻᒪᕆᐅᔪᖅ ᐃᓗᕐᖁᑎᕐᒧᐊᖓᔪᓂᒃ ᐱᒍᑦᔨᓂᖃᕐᓂᖅ.
ᐅᕙᓐᓄᑦ ᐃᑉᐱᓇᕐᓂᐸᐅᓯᒪᔪᖅ ᐱᓇᓱᐊᕐᑐᓂᒃ ᑐᓚᑦᑕᕕᒻᒥ ᑕᑯᓐᓇᓯᒪᒐᒪ ᑲᒪᔨᓂᒃ ᑐᑭᒧᐊᑦᑎᓯᔨᓂᒃ ᐊᓯᖏᓐᓂᓗ ᐱᓇᓱᑦᑎᓂᒃ ᑲᑐᑦᔨᓱᑎᒃ ᖃᓄᕐᑑᖃᑎᒌᑦᓯᐊᓂᖃᕐᑎᓗᒋᑦ ᓄᓇᓕᒻᒥ ᑲᑉᐱᐊᓇᑐᖃᕐᑎᓗᒍ. ᐃᓘᓐᓇᑎᒃ ᐱᓇᓱᐊᓐᓂᐅᓲᑦ ᑲᑎᑦᓱᑎᒃ ᓱᖑᔪᑦᓯᐊᓄᑦ ᐱᓇᓱᐊᕐᑕᐅᒍᓐᓇᓂᖏᓐᓂᒃ ᓄᐃᑕᑎᑦᓯᒍᑕᐅᔪᑦ.
ᐱᓇᓱᐊᕐᓯᒪᓕᕐᑐᖓ 8-ᓂᒃ ᐊᕐᕌᒍᕐᓂᒃ ᑐᓚᑦᑕᕕᒻᒥ ᐱᒍᑦᔨᒍᒪᓂᑯᒐᓄᑦ ᓄᓇᓕᒐᓂᒃ. ᐊᓕᐊᓱᓲᖑᒐᒪ ᑲᒪᒋᐊᒥᒃ ᐃᓚᓐᓈᑲᓂᒃ, ᐃᓚᒃᑲᓂᒃ, ᓯᓚᕐᖃᑎᒃᑲᓂᒃ ᑰᑦᔪᐊᒥᐅᖑᖃᑎᒃᑲᓂᓪᓗ ᑕᑯᔭᐅᕕᖅᓴᖏᓐᓂᒃ ᐅᓪᓗᓕᐃᕆᒍᑦᔨᓲᖑᑦᓱᖓ ᐋᓐᓂᐊᓯᐅᕐᑕᐅᓯᐊᖁᔨᒐᒪ.
ᐱᓇᓱᐊᖃᑕᐅᒋᐊᒥᒃ ᐋᓐᓂᐊᓯᐅᕐᑎᒪᕆᓐᓄᑦ ᐋᓐᓂᐊᓯᐅᕐᑎᑐᐃᓐᓇᓄᓪᓗ ᐊᓕᐊᓇᕐᑐᖅ ᐃᓕᑦᓯᕙᓪᓕᐊᓲᖑᒐᒪ ᖃᓄᐃᓘᓲᖑᒻᒪᖔᑕ ᖃᓄᐃᖏᓯᐊᕐᓂᓕᕆᓂᕐᒥ.
ᐃᓱᕐᕆᑐᐃᓐᓇᕕᒐᓂ ᕿᒪᐃᓗᖓ ᓅᒍᒪᓯᓚᐅᔪᔪᖓ ᐱᐅᔪᒧᑦ ᓄᓇᒧᑦ ᑯᐸᐃᑉ ᑕᕐᕋᖓᓃᑦᑐᒧᑦ. ᑎᑭᑦᓴᑐᐊᕋᒪ ᐱᐅᑦᓴᕙᕐᔪᐊᓯᒌᓚᐅᔪᔪᖓ ᐃᓄᐃᑦ ᐃᓗᕐᖁᓯᖓᓂᒃ, ᑕᒪᒃᑯᓂᖓᓗ ᐊᔪᒐᐃᑦᑑᓱᑎᒃ ᓄᓇᓂᒃ ᐱᐅᔪᒻᒪᕆᓐᓂᒃ, ᐃᓄᐃᓪᓗ ᐃᓅᓯᖓᓂᒃ, ᐊᓯᖏᓐᓂᓗ.
ᓱᓇᑐᐃᓐᓇᓄᑦ ᐅᒃᑯᐃᖔᑦᓯᐊᕈᓐᓇᓂᑯᒐᓄᑦ ᓱᖏᐅᑎᑦᓯᐊᕈᓐᓇᓂᕋᓄᓪᓗ ᐱᒍᓐᓇᓯᒍᑎᒋᓯᒪᔮᒃᑲ ᐊᑦᔨᒌᖏᑐᓂᒃ ᓵᖓᓯᖃᑦᑕᕆᐊᖃᕐᓂᒥᒃ (ᑕᒪᒋᑦᑎᒍᑦ ᐱᓇᓱᐊᕐᓂᑯᑦ ᓇᒻᒥᓂᕐᓗ ᐃᓅᓯᕋᑎᒍᑦ) ᑕᒪᓐᓇ ᐱᐅᔪᐊᓗᒻᒥ ᐱᑖᕐᕕᒋᑦᓱᒍ.
ᑰᑦᔪᐊᒧᑦ ᑎᑭᒋᐊᖓᓚᐅᔪᔪᖓ 1989-ᖑᑎᓪᓗᒍ, ᑕᑕᒥᓐᓇᓯᒪᔪᖅ! ᐅᑭᐅᒥ ᐃᑦᔨᓕᕙᕐᔪᐊᓱᓂ, ᐅᓪᓗᑭᑦᑐᒪᕆᐅᑦᓱᓂ ᓄᓇᖓᓗ ᐱᐅᔪᒻᒪᕆᐅᑦᓱᓂ... ᐅᑭᐅᒥᒃ ᐱᐅᑦᓴᓂᕋᕈᓐᓇᑐᖓ!
ᑲᑎᓯᓚᐅᔪᔪᖓ ᐃᓅᓯᓕᒫᕋᓂ ᐊᖑᑎᒋᓂᐊᕈᒪᓕᕐᑕᕋᓂᒃ 1997-ᖑᑎᓪᓗᒍ. ᑰᑦᔪᐊᒥ ᐊᐅᓪᓚᓚᐅᔪᔪᒍᒃ 1998-ᖑᑎᓪᓗᒍ ᐅᑎᕐᓱᓄᒃ 2002-ᒥ... ᐅᑎᖃᔭᐅᔫᔮᓕᕐᓱᓄᑦ ᑕᕐᕋᒧᑦ! ᑐᖓᓱᑦᑎᑕᐅᑦᓯᐊᓚᐅᔪᔪᒍᒃ ᓄᓇᓕᒻᒧᑦ, ᐊᓂᕐᕋᑑᔮᕐᓱᓄᒃ. ᐃᒫᖓᐃᕐᑎᐅᕗᖓ ᐱᓇᓱᑦᑎᓕᕆᕕᒻᒥ ᐊᒻᒪᓗ ᓯᐊᔾ ᐃᑲᔪᕐᑎ ᑲᒪᔨᒥᒃ ᐋᓂᐊᓯᐅᕈᑎᓂᒃ ᖃᐅᔨᓴᕐᕕᒥ. ᐱᓇᓱᒐᕗᒃ ᐅᖁᒪᐃᑦᑐᕋᑕᐅᒐᓇᐊᕐᓱᑎᒃ ᐱᕙᓪᓕᓇᑦᓯᐊᑑᒃ! ᓱᖏᐅᑎᑦᓴᐅᑎᒋᒍᓪᓇᓂᕗᒃ ᐃᑲᔪᕐᓯᒪᓪᓚᕆᑦᑐᖅ ᐅᕙᑦᑏᓂᒃ ᐊᒥᓱᓂᓪᓗ ᐱᓇᓱᐊᕈᓐᓄᓂᕗᕐ ᐃᑲᔪᕐᓯᒥᑎᓪᓗᒍ ᐊᑯᓂ ᐱᓇᓱᒐᕗᓐᓂ ᒪᒃᑯᐊ ᐱᓇᓱᒐᕗᓐᓄᑦ ᐊᑕᑯᑖᕈᓐᓂᐅᑎᒋᑦᓱᒋᑦ ᑕᒫᓂᒥᐅᖑᑯᑖᕈᓐᓇᐅᑎᒋᑦᓱᒋᑦ ᐊᑦᔨᐅᖏᓪᓚᕆᑦᑎᓗᒍ ᖃᓪᓗᓈᑦ ᓄᓇᖓᓃᒐᔭᕈᓐᓄᒃ. ᐅᑭᐅᕗᒃ ᓈᒻᒪᓯᓕᕐᑎᒍᒋᒃ ᓄᖃᓂᑦᓴᕗᓐᓄᑦ ᐅᐱᒍᓱᑦᑐᒍᒃ ᐃᑲᔪᕐᓯᓯᒪᒋᐊᒥᒃ ᐱᒍᑦᔨᓂᐅᔪᓂᒃ ᑐᓚᑦᑕᕕᒻᒥ. ᐅᕙᑦᑏᓄᑦ ᑕᒪᓐᓇ ᐱᓇᓱᐊᕐᓂᑐᐃᓐᓇᐅᖏᒻᒪᑦ, ᐃᓅᓯᑦᑎᓄᑦ ᐃᓕᖓᓪᓚᕆᕐᒪᑦ ᑕᕐᕋᒥᐅᖑᓂᕆᓚᐅᕐᑕᕗᓐᓄᑦ, ᐃᓕᑦᓯᕙᓪᓗᓇᕐᑐᐊᓗ!
ᐱᒋᐊᕋᑖᕐᓱᖓ ᐊᑯᓂᐅᖏᑐᖅ ᐱᓇᓱᓚᖓᔪᕆᓚᐅᔪᔪᖓ. ᖃᐅᔨᒪᓐᓂᖏᑦᑐᖓ, 30ᓂᒃ ᐊᕐᕌᒍᕐᓂᒃ ᐱᓇᓱᐊᓛᕆᐊᒥᒃ, ᑕᒫᓃᖏᓐᓇᑐᖓ!
ᐊᑦᔨᒌᖏᑐᓂᒃ ᐃᓪᓗᓯᖃᕐᓂᔪᓐᓄᑦ ᐃᓕᖓᔪᓂᒃ ᖃᐅᔨᒋᐅᖃᑎᖃᖃᑦᑕᕆᐊᒥᒃ ᖃᓪᓗᓈᓂ ᐱᓯᒪᔪᓂᒃ ᐊᓕᐊᒋᓲᕋ ᐱᓇᓱᕝᕕᒐᓂ. ᐊᓕᖓᒋᓂᕐᐹᖃᕐᑐᖓ ᐱᓇᓱᒐᕋᓂᒃ ᐊᓪᓗᑎᐅᑦᓱᖓ ᐃᑲᔪᕈᓐᓇᓲᖑᒐᒪ ᐋᓐᓂᐊᓯᐅᕐᑎᓂᒃ ᑲᒪᑎᓪᓗᒋᑦ ᓄᓇᓕᑦᑎᓂ.
ᐱᓇᓱᐊᓕᕐᑐᖓ ᐊᕐᕌᒍᕐᓂᒃ 26-ᓂᒃ ᐋᓐᓂᐊᕕᒻᒥ ᐅᓪᓗᐃᑦ ᐊᑦᔩᑐᐃᓐᓇᓚᐅᕐᓯᒪᑎᓐᓇᒋᑦ ᑕᐃᒪᖓ ᓄᑖᓂ ᐱᔭᕆᐊᓕᓐᓂᒃ ᓵᖓᓯᒋᐊᖃᓲᖑᒐᒪ.
ᐊᓕᒋᐊᒋᔭᖃᕐᓂᐸᐅᔪᖓ ᐱᓇᓱᒐᕋᓂᒃ ᑕᐃᒪᖓᓕᒫᖅ ᐱᔭᑦᓴᖃᐃᓐᓇᓯᐊᕋᑦᑕ ᓄᑖᓂᒃ ᐱᔭᕆᐊᓕᓐᓂᒃ. ᐃᒻᒥᓂᕿᓗᖓ ᐱᓇᓱᕝᕕᒋᒋᐊᓕᒃᑲᓂᒃ ᑲᐃᕙᓪᓚᒍᓯᓕᐅᕐᕈᓐᓇᕈᒪᔪᖓ ᐃᒻᒥᓂᓪᓗ ᐱᓇᓱᐊᕐᕕᒐᓂᒃ ᐋᕿᓯᒪᐅᓯᒋᒍᒪᔭᕋᓂᒃ ᐋᕿᓯᒪᑎᑦᓯᒍᑎᖃᕐᓗᖓ. ᑐᓚᑦᑕᕕᒻᒥ ᕿᑎᖑᓯᐅᓕᕐᒪᑕ ᐹᑏᕐᓱᑎᒃ ᐊᓕᐊᓇᕐᑐᐊᓗᒃ ᑲᑎᖓᓯᒋᐊᒥᒃ ᐊᑦᔨᒌᖏᑐᓂᒃ ᐱᓇᓱᐊᕐᕕᓕᓐᓂᒃ ᐊᒻᒪᓗ ᐅᖄᒍᑎᖃᕆᐊᒥᒃ ᐱᕙᓪᓕᕈᑎᒋᓯᒪᔭᕐᑎᓂᒃ ᐊᓕᐊᓱᖑᐊᓱᓂᓗ.
ᑐᓚᑦᑕᕕᒻᒧᑦ ᐱᒍᓐᓇᓯᑎᑕᐅᓯᒪᔪᖓ ᐃᑲᔪᕈᓐᓇᑎᑕᐅᑦᓱᖓ ᐱᐅᐊᕋᕐᓂᒃ ᐱᓇᐃᓗᑕᓕᓐᓂᒃ. ᐱᓇᓱᒐᖃᕐᓂᑯᑦ ᐱᔪᓐᓇᓂᕐᑖᓯᒪᔪᖓ ᐃᑲᔪᕐᑎᐅᓂᐊᕐᓱᖓ ᐊᑦᑕᓇᖏᑐᑦᓯᐊᒥᒃ ᐃᓅᓯᖃᕐᓂᓴᖓᑎᒍᑦ ᐊᒥᓱᓂᒃ ᓵᖓᓯᓲᖑᒻᒪᑕ ᐱᔭᕐᓃᓕᐅᕈᑎᓂᒃ.
ᐊᓕᐊᓇᕐᓂᐹᑦᓯᐊᖅ ᐱᐊᕋᕐᓄᑦ ᖁᖓᑦᑐᓄᑦ ᐅᐸᑦᑕᐅᒋᐊᒥᒃ ᓇᑯᕐᒦᕆᐊᕐᑐᑐᓄᑦ.
ᐊᔪᐃᓐᓇᕈᑎᖃᓲᖑᔪᖓ ᐱᓇᓱᒐᕆᓕᕐᑕᕋᓂᒃ 22-ᓂᒃ ᐊᕐᕌᒍᕐᓂᒃ ᐱᒍᑦᔨᓂᕐᑎᒍᑦ ᑖᑦᓱᒥᖓᑦᓴᐃᓇᖅ ᑐᕌᒐᖃᕐᓱᑕ ᐱᕙᓪᓕᐊᑎᑦᓯᒍᒪᓂᕐᒥᒃ ᓄᓇᓕᒻᒥ.