ᐱᐅᔪᓂᒃ ᐅᖃᐅᓯᖃᕈᑕᐅᓯᒪᓕᕐᑎᓗᒋᑦ ᓄᐃᑕᐅᓂᕕᓂᖏᑦ ᓴᓇᖕᖑᐊᓯᒪᔪᑦ ᐊᐅᐸᓘᑉ ᐋᓐᓂᐊᕕᑦᑖᖃᒻᒥᖓᓂ 2023-ᖑᑎᓪᓗᒍ, ᐃᓂᓪᓚᕕᒃ ᑯᑦᔪᐊᒥ ᑐᔪᕐᒥᐅᕕᒃ ᑐᖕᖓᓱᑦᑎᓯᓕᕆᕗᖅ ᑐᓚᑦᑕᕕᐅᑉ ᑐᓂᕐᕈᓯᐊᕆᐊᓪᓚᖏᓐᓂᒃ ᓴᓇᖕᖑᐊᓯᒪᔪᑎᒍᑦ ᒪᒥᓴᕐᓂᒧᑦ ᑮᓇᐅᔭᖃᕐᑎᓯᕕᐅᔪᒥᑦ.
ᑕᒪᓐᓇ ᐊᖏᔪᐊᓗᒃ ᑐᓂᔨᓂᐅᔪᖅ ᐱᕕᖃᕐᑎᓯᓚᖓᕗᖅ ᑐᔪᕐᒥᐅᕕᒻᒦᐸᓐᓂᐊᑐᓂᒃ, ᐱᓇᓱᑦᑎᓂᒃ ᓄᓇᓕᒻᒥᓗ ᐅᐱᒍᓱᓕᐅᒥᑎᓪᓗᒋᑦ ᐱᑕᓕᐊᓗᒻᒥᒃ ᐃᓕᕐᕈᓯᖃᕐᓂᖓᓂᒃ, ᐊᑑᑎᓯᒪᔭᖏᓐᓂᒃ ᐱᕐᖁᓯᖃᕐᓂᖓᓂᓪᓗ ᐅᑭᐅᕐᑕᑐᒥᐅᑦ.
ᐊᑭᓐᓇᒦᑦᑎᑕᐅᔪᑦ ᓴᓇᔭᐅᓯᒪᔪᑦ ᓄᓇᓕᑐᖃᑦᓴᔭᓄᑦ ᐃᓄᑐᐃᓐᓇᓄᓪᓗ ᓴᓇᖕᖑᐊᑎᓄᑦ. ᓄᐃᑕᑎᑦᓯᒍᑎᐅᔪᑦ ᐃᓅᓯᖓᓐᓂᒃ ᐅᑭᐅᕐᑕᑐᒥᐅᑦ. ᓇᓗᓀᒃᑯᑕᖏᑦ ᐊᑭᓐᓇᒥᐅᑕᐅᑉ ᓴᓂᐊᓃᑦᑐᑦ ᑐᑭᓯᓇᕐᑎᓯᔪᑦ ᓱᓇᖕᖑᐊᖑᒻᒪᖔᑦ ᓴᓇᖕᖑᐊᓯᒪᔪᖅ, ᑭᓇᐅᒻᒪᖔᑦ ᓴᓇᔪᕕᓂᖅ ᐊᒻᒪᓗ ᓴᕐᕿᔮᕐᑎᓯᒍᑎᐅᑦᓱᓂ ᐱᑕᓕᐊᓗᒻᒥᒃ ᐃᓕᕐᕈᓯᖃᕐᓂᖓᓂᒃ ᐅᑭᐅᕐᑕᑐᒥᐅᑦ.
ᑖᒃᑯᐊ ᓄᐊᑕᐅᓯᒪᔪᑦ ᐃᓚᖃᕐᑐᖅ ᐅᔭᕋᕐᒧᑦ ᓴᓇᖕᖑᐊᓯᒪᔭᖏᓐᓂᒃ ᑏᕕ ᐃᑦᑑᑉ, ᓄᓇᕕᒻᒥᐅᖑᑦᓱᓂ ᓴᓇᖕᖑᐊᑎ, ᐃᓚᒋᔭᐅᑎᓪᓗᒍ ᑌᔭᐅᒍᑎᓕᒃ ᑑᕐᙰᑦ ᓱᕐᕙᑕᕆᐊᕐᑐᑐᑦ ᐅᓐᓄᐊᒥ ᐊᒻᒪᓗ ᒥᖑᐊᕐᓯᒪᔪᖅ ᐊᑭᓐᓇᒥᐅᑕᖅ ᓴᓇᔭᐅᒪᔪᖅ ᓘᓯ ᕿᓐᓄᐊᔪᐊᒧᑦ ᐅᑭᐅᕐᑕᑐᒧᑦ ᐅᑎᕐᓯᒪᓕᕐᑐᒧᑦ ᐊᒥᓱᒐᓚᓐᓂᒃ ᑯᐯᒻᒥ ᖃᓪᓗᓈᑦ ᓄᓇᖓᓐᓂᒥᐅᖑᓯᒪᑦᓱᓂ. ᑕᒪᒃᑯᐊ ᓴᓇᖕᖑᐊᓯᒪᔪᑦ ᓇᑯᕐᒦᕈᑎᐅᑦᓱᑎᒃ ᐆᓂ ᕋᔅᑯᕙᒥᒃ ᑭᒍᑌᕐᓯᔨᒥᒃ ᑐᓂᔭᐅᓚᐅᕐᑐᕕᓃᑦ, ᐊᒥᓱᒐᓚᓐᓂᒃ ᐊᕐᕌᒍᓂᒃ ᐱᓇᓱᐊᕐᓯᒪᓂᕕᓂᖓᓄᑦ ᐅᑭᐅᕐᑕᑐᒥᐅᓂᒃ ᑲᒪᒋᔭᖃᕐᓱᓂ. ᑖᓐᓇ ᐆᓂ ᕋᔅᑯᕙ ᐃᓅᒍᓐᓀᓯᒪᓕᕐᑎᓗᒍ ᐃᓚᖏᑦ ᓴᓇᖕᖑᐊᓯᒪᔪᒥᒃ ᑌᔭᐅᔪᒥᒃ ᐊᕐᓀᑦ ᐊᒥᐊᕐᑐᑦ ᖃᔭᕐᒥᒃ ᑐᓂᓯᔪᕕᓂᐅᓕᕐᑐᑦ ᓴᓇᖕᖑᐊᓂᒃᑯᑦ ᒪᒥᓴᕐᓂᒧᑦ ᑮᓇᐅᔭᖃᕐᑎᓯᕕᒻᒧᑦ, ᐅᑎᕐᑎᑕᐅᒐᔭᖁᑦᓱᒍ ᓄᐃᒋᐊᖕᖓᕕᒋᓯᒪᔭᖓᓄᑦ.
ᓴᓇᖕᖑᐊᓂᒃᑯᑦ ᒪᒥᓴᕐᓂᒧᑦ ᑮᓇᐅᔭᖃᕐᑎᓯᕕᒃ ᑎᒥᐅᔪᖅ ᖄᖏᕐᓂᑯᓕᐅᕐᑎᓴᔭᐅᒐᓂᒃ ᓄᐃᑕᐅᓯᒪᔪᖅ ᐆᓪ ᐱᓐᓱᒃᒧᑦ ᑭᐊᕆ ᐱᓕᐊᒧᓪᓗ 2002-ᖑᑎᓪᓗᒍ ᐱᓇᓱᐊᒐᖃᕐᓱᓂᓗ ᓄᐃᑎᕆᓂᕐᒥᒃ ᒪᒥᓴᕈᑕᐅᒍᓐᓇᓂᖓᓂᒃ ᓴᓇᖑᐊᓯᒪᔪᐃᑦ ᐋᓐᓂᐊᕕᓐᓂ ᖃᓄᐃᖕᖏᓯᐊᕐᑐᓕᕆᕕᓐᓂᓗ, ᐊᓯᑦᔨᑎᕆᒍᑕᐅᑦᓱᑎᒃ ᓇᐅᓕᒫᓄᑦ ᐋᓐᓂᐊᕕᓕᐊᕐᓯᒪᔪᓄᓪᓗ ᓇᔪᒐᐅᔪᓂᒃ ᓯᕗᒧᐊᓕᐅᒥᒍᒥᓇᕐᑐᓕᐊᕆᑦᓱᒋᑦ ᓭᒪᓇᕐᑐᑎᑦᓯᓱᑎᒃ ᖁᓚᕐᓇᖏᑦᑑᑎᑦᓯᓱᑎᓪᓗ ᐋᓐᓂᐊᕕᓕᐊᕐᓯᒪᔪᓄᑦ, ᐃᓚᖏᓐᓄᑦ ᐋᓐᓂᐊᕕᐅᔪᓂᓗ ᐱᓇᓱᐊᕐᑎᐅᔪᓄᑦ. ᑌᒪᖕᖓᓂᑦ ᓄᐃᓕᕐᓂᕋᒥ ᑖᓐᓇ ᑮᓇᐅᔭᖃᕐᑎᓯᕕᒃ ᐃᓂᓪᓓᓯᒪᓕᕐᑐᖅ 14,500 ᐅᖓᑖᓃᑦᑐᓂᒃ ᓴᓇᖕᖑᐊᓯᒪᔪᓂᒃ 102-ᓂ ᐋᓐᓂᐊᓯᐅᕆᕕᐅᔪᓂ ᑲᓇᑕᓕᒫᒥ, ᕗᕋᓐᔅᒥ ᒍᐃᒍᐃ ᓄᓇᖓᓐᓂ ᑕᕆᐅᑉ ᐊᑭᐊᓂ ᐊᒻᒪᓗ ᐊᑕᓂᐊᓘᑉ ᓄᓇᖓᓂ ᐃᖕᓚᓐᒥ.
ᐊᑐᐊᕐᓯᒋᐊᓪᓚᕆᑦ: