ᕿᑲᕐᓇᐅᓕᕐᒥᑎᓪᓗᒍ, ᖃᓄᐃᖕᖏᓯᐊᕐᑐᓕᕆᔩᑦ ᑐᓚᑦᑕᕕᒻᒥ ᐊᑐᑎᖃᑦᓯᐊᑐᒃᑯᑦ ᐃᑲᔪᕐᓯᒪᓂᖃᓕᕆᕗᑦ ᖁᕕᐊᓱᕝᕕᓯᐅᑎᓂᒃ ᐊᑐᐃᓐᓇᐅᑎᑦᓯᓂᒃᑯᑦ.
ᑖᓐᓇ ᐱᓇᓱᐊᕐᑕᖓ ᑐᕋᕐᑐᖅ ᓂᕿᖃᑦᓯᐊᑎᑦᓯᓂᕐᒧᑦ ᑯᑦᔪᐊᒥ ᓄᓇᓕᐅᖃᑎᒌᑦᓯᐊᑎᑦᓯᒍᑎᐅᑦᓱᓂᓗ, ᓴᕐᕿᔭᕐᑎᓯᒍᑎᐅᔪᖅ ᐊᒥᕐᖄᖃᑎᒌᓐᓂᒥ, ᖁᐊᕕᐊᓱᖃᑎᒌᓐᓂᒥᒃ ᐃᑲᔪᖃᑎᒌᓐᓂᖓᓂᓪᓗ ᓄᓇᓕᐅᑉ ᐋᓐᓂᐊᕕᐅᓪᓗ ᐱᒍᑦᔨᕕᖏᑦᑕ.
ᑎᓯᒻᐱᕆ 9-ᒥ 10-ᒥᓗ, ᐱᓇᓱᐊᕐᑐᑦ ᐋᕐᕿᓱᐃᓚᐅᕐᑐᑦ ᐸᔪᕋᐅᑎᖃᕐᓱᑎᓪᓗ ᖁᕕᐊᓱᕝᕕᓯᐅᑎᓂᒃ 80-ᓄᑦ ᐊᓂᕐᕋᕆᔭᐅᔪᓄᑦ ᑯᑦᔪᐊᒥ. ᐊᑐᓂ ᖁᕕᐊᓱᕝᕕᓯᐅᑎᒃ ᐃᓗᓕᖃᕐᑎᓗᒍ ᑭᖕᖑᒪᓇᕐᑐᓕᒫᓂᒃ ᖁᕕᐊᓱᕝᕕᒥ ᓂᕆᒍᑎᑦᓴᐅᓂᐊᕐᓗᑎᒃ. ᓇᑯᕐᒦᒃ ᑮᓇᐅᔭᖃᕆᐊᓪᓚᑎᑕᐅᓚᐅᕋᑦᑕ ᐃᓗᓯᓕᕆᔨᒃᑯᓄᑦ, ᐱᓇᓱᐊᕐᑎᕗᑦ ᐃᓓᓐᓇᖏᓐᓂᒃ ᐊᑭᓖᒍᓐᓇᓯᓚᐅᕐᑐᑦ ᑖᒃᑯᐊ ᑐᓂᕐᕈᑏᑦ ᐊᑭᖏᓐᓂᒃ.
ᐱᓇᓱᐊᕐᓂᕗᑦ ᑕᒪᑐᒥᖓ ᑯᑦᔪᐊᑉ ᓯᓚᑖᓅᓚᐅᕐᒥᔪᖅ, ᐱᖓᓲᔪᕐᑐᓂᒃ ᓄᓇᓕᒋᐊᓪᓚᓂᒃ ᐅᖓᕙᒥ ᐊᑑᑎᔭᐅᓚᐅᕐᒥᒐᒥ. ᑲᔪᓯᑎᑕᐅᑦᓱᓂ ᖃᓄᐃᖕᖏᓯᐊᕐᑐᓕᕆᔨᓄᑦ ᐃᓄᓕᕆᔨᓄᓪᓗ, ᐸᔪᕋᕐᓂᖅ ᑖᒃᑯᓇᓂ ᓄᓇᓕᓐᓂ ᐸᕐᓇᑕᐅᔪᖅ ᑎᓯᒻᐱᕆ 16-20, ᓂᖀᓕᐅᕈᑎᑦᓭᑦ ᑎᑭᑐᐊᕐᐸᑕ. ᐅᑯᐊᑕᒐ ᐊᓂᕐᕋᐅᔪᑦ ᐱᕙᓪᓕᑕᐅᓚᖓᔪᑦ ᐊᑐᓂ ᓄᓇᓕᓐᓂ:
ᑲᖏᕐᓱᐊᓗᑦᔪᐊᒥ, ᑌᒣᓗᕐᓂᕗᑦ ᐃᑲᔪᕐᓯᒪᔭᐅᒻᒪᕆᓐᓂᖃᓚᐅᕐᑐᖅ ᖃᕐᒫᐱᒻᒧᑦ, ᑮᓇᐅᔭᖃᕐᑎᓯᓚᐅᕐᒪᑕ ᐊᑐᐃᓐᓇᕈᕐᑎᕆᖃᑎᐅᑦᓱᑎᓪᓗ. ᐱᓇᓱᐊᖃᑎᒌᓐᓂᑯᑦ, 120-ᓂᒃ ᐃᓚᒌᓂᒃ ᐃᑲᔪᕈᓐᓇᓯᓚᐅᕐᑐᑦ, ᐋᕐᕿᓱᐃᑦᓱᑎᒃ ᐸᔪᕋᕈᑎᖃᕐᓱᑎᓪᓗ ᑎᓯᒻᐱᕆ 9, 10, 11-ᒥᓗ. ᑕᒪᓐᓇ ᓯᕗᓕᕐᑕᐅᓚᐅᕐᑐᖅ ᖃᓄᐃᖕᖏᓯᐊᕐᓂᓕᕆᔨᑦᑖᖃᒻᒥᒧᑦ, ᐃᐊᓚᓯ ᐋᓇᓇᒃᒧᑦ, ᐱᓇᓱᐊᖃᑎᖃᕐᓱᓂ ᓄᓇᓕᐅᑉ ᐋᓐᓂᐊᕕᖓᓂᒃ, ᖃᕐᒫᐱᐅᑉ ᐱᓇᓱᑦᑎᖏᓐᓂᒃ ᑲᑎᒪᔩᒃᑯᓄᑦ ᐃᑲᔪᕐᓯᒪᔭᐅᒻᒥᓱᑎᒃ.
ᖃᓄᐃᖕᖏᓯᐊᕐᑐᓕᕆᔩᑦ ᖁᕕᐊᓱᕝᕕᒥ ᑐᓂᔨᓂᖓ ᓄᐃᑕᑎᑦᓯᒍᑎᐅᕗᖅ ᓄᓇᓕᒻᒥ ᐱᓇᓱᐊᖃᑎᒌᓐᓂᐅᑉ ᓱᖑᔪᑦᓯᐊᖑᓂᖓᓂᒃ, ᐊᔪᐃᓐᓇᓂᕆᔭᖓᓂᓪᓗ ᐱᓇᓱᐊᕐᑎᑕ ᖁᐊᕕᐊᓇᕐᑐᖃᕐᑎᓯᑦᓱᑎᒃ ᐃᑲᔪᕐᓱᑎᓪᓗ ᐃᓚᒌᓂᒃ ᕿᑲᕐᓇᐅᑎᓪᓗᒍ ᖁᕕᐊᓱᕝᕕᒥ. ᓇᑯᕐᒦᒃ ᑭᓇᓕᒫᑦᓯᐊᑯᑦ ᐃᑲᔪᕐᓯᒪᓚᐅᕐᑐᑦ ᑕᒪᓐᓇ ᐱᓇᓱᐊᕐᑕᕗᑦ ᑲᔪᓯᑦᓯᐊᖁᓪᓗᒍ!