ᑲᖏᕐᓱᔪᐊᑉ ᐋᓐᓂᐊᕕᐊᐱᖓ 25-ᓂᒃ ᐱᓇᓱᑦᑎᓕᒃ ᐊᒻᒪᓗ 750-ᓂᒃ ᐃᓄᖃᕐᓱᓂ. ᖃᐅᔨᒍᒪᕖᑦ ᑕᕐᕋᒥᐅᖑᓂᖅ ᖃᓄᐃᑦᑑᒪᖔᑦ? ᑖᓐᓇ ᓄᓇᓕᑦᓴᓯᐊᖅ ᐃᓕᓐᓄᑦ : ᓄᓇᓕᐅᑦᓱᓂ ᑕᕐᕋᒦᓐᓂᐹᖅ ᐅᖓᕙᒥ.
ᑐᓚᑦᑕᕕᐅᑉ ᐋᓐᓂᐊᕕᖓ ᑰᑦᔪᐊᒦᑦᑐᖅ, ᐅᖓᕙᒥ ᓄᓇᓕᓐᓂ ᐊᖏᓂᕐᐸᐅᔪᒥ ᐃᓄᖃᕐᓱᓂ 3,000 ᒥᑦᓵᓂ: 3-ᓂᒃ ᓂᐅᕕᕐᕕᖃᕐᓱᓂ ᓂᕿᓯᕕᓐᓂᒃ, 1 ᓯᓂᑦᑕᕕᒃ, 2 ᓂᕆᕖᒃ, 1 ᐃᖃᐃᓕᓴᕐᕕᒃ, 1 ᐅᖁᒪᐃᑦᑐᒥᒃ ᐸᑦᑕᒥᒃ ᐊᑦᓴᑳᑦᑎᓯᕕᒃ, 1 ᐳᐃᑦᔪᕋᕐᕕᒃ, 1 ᑕᕐᕋᓕᔮᕐᕕᒃ, 1 ᐃᒥᕐᕕᒃ, ᐊᒻᒪᓗ ᐅᓄᐊᖑᓕᕐᒪᑦ ᖃᐅᒻᒪᑕᐅᒪᓲᖑᑦᓱᓂ ᐊᕐᓴᓂᕐᓄᑦ, ᐃᓅᓯᖃᑦᓯᐊᓇᕐᑐᖅ ᑕᑯᒋᐅᕐᓇᓱᓂᓗ. 300 ᒥᑦᓵᓃᑦᑐᓂᒃ ᑐᓚᑦᑕᕕᒃ ᐱᓇᓱᑦᑎᓕᒃ.
ᑕᓯᐅᔭᐅᑉ ᐋᓐᓂᐊᕕᐊᐱᖓ 12-ᓂᒃ ᐱᓇᓱᑦᑎᓕᒃ ᐊᒻᒪᓗ 400-ᓂᒃ ᐃᓄᖃᕐᓱᓂ. ᖃᐅᔨᒍᒥᓇᕐᑐᖅ: ᑖᓐᓇ ᓄᓇᓕᒃ ᐅᓕᓐᓂᕆᓐᓂᐹᕐ ᓯᓚᕐᔪᐊᒥ
ᐊᐅᐸᓘᑉ ᐋᓐᓂᐊᕕᐊᐱᖓ 12-ᓂᒃ ᐱᓇᓱᑦᑎᓕᒃ 250 ᐅᖓᑖᓂ ᐃᓄᖃᕐᓱᓂ. ᖃᐅᔨᒍᒥᓇᕐᑐᖅ: ᓄᓇᓕᒃ ᑐᒃᑐᐃᑦ ᐋᕐᖁᓵᕐᕕᒋᓲᖓᑕ ᓴᓂᐊᓃᑦᑐᖅ, ᑕᑯᒃᖏᕕᖃᖏᑕᓯ ᐱᓱᕋᔮᓕᕈᑦᓯ!
ᑲᖏᕐᓱᒥ ᐋᓐᓂᐊᕕᐊᐱᖓ ᐱᓇᓱᑦᑎᓕᒃ 15-ᓂᒃ ᐊᒻᒪᓗ ᐃᓄᖃᕐᓱᓂ 600-ᐅᖓᑖᓃᑦᑐᓂᒃ. ᖃᐅᔨᒍᒥᓇᕐᑐᖅ: ᐃᖃᓪᓕᐊᕈᒪᓯᑏᑦ ᑕᒡᒐᓂ ᓄᓇᓕᒻᒥ ᐊᓕᐊᓱᒐᔭᕐᑐᑦ. ᐊᒥᓱᕋᓴᕐᔪᐊᓂᒃ ᑕᓯᓕᒃ ᑰᖃᕐᓱᓂᓗ ᖃᐅᔨᒪᔭᐅᔪᓂᒃ ᐃᖃᓗᑉᐱᖃᕆᐊᖏᑦ ᐃᓯᐅᕋᓕᑦᑖᓂᓪᓗ.
ᖁᐊᕐᑕᒥ ᐋᓐᓂᐊᕕᐊᐱᖓᓂ 20-ᓂᒃ ᐱᓇᓱᑦᑎᓕᒃ ᐊᒻᒪᓗ 450-ᓂᒃ ᐃᓄᖃᕐᓱᓂ. ᖃᐅᔨᒍᒥᓇᕐᑐᑦ: ᓯᓚᒃᑯᑦ ᓄᓇᒥ ᐱᓱᒋᐊᖠᒃ ᐊᓕᐊᑦᑐᓄᑦ ᑖᓐᓇ ᓄᓇᓕᒃ ᐊᓕᐊᒋᔭᐅᒍᓇᖅ, ᖃᖃᓄᑦ ᖁᕐᕈᔭᐅᒪᒻᒪ ᓄᓇᓕᐊ!
ᑲᖏᕐᓱᐊᓗᑦᔪᐊᑉ ᐋᓐᓂᐊᕕᐊᐱᖓ ᐱᓇᓱᑦᑎᓕᒃ ᒥᑦᓵᓂ 30-ᓂᒃ, ᐃᓄᖃᕐᓱᓂ 900 ᐅᖓᑖᓃᑦᑐᓂᒃ. ᐊᓕᐊᓇᕐᓱᓂ ᖃᐅᔨᒐᑦᑕᖅ : ᓄᓇᓕᒃ ᓇᕐᑐᓕᐅᑉ ᑭᓪᓕᐊᐱᖓᓃᑦᑐᖅ. ᑖᓐᓇᑑᑦᓱᓂ ᐅᖓᕙᐅᑉ ᓄᓇᓕᖏᓐᓂ ᓇᐹᕐᑐᓕᒻᒦᑐᖅ.
ᐅᖓᓯᑦᑐᒦᒐᒥ ᐃᓄᖃᓪᓗᐊᖏᑦᑐᒥ ᓄᓇᕕᒃ ᖃᖓᑦᑕᔫᒃᑯᑦ ᑭᓯᐊᓂ ᐅᐸᑕᐅᒍᓐᓇᑐᖅ ᐊᖁᑎᖃᖏᓱᓂᓗ ᓄᓇᓖᑦ ᓯᓚᑖᓅᕐᑐᓂᒃ.
ᐃᓄᖏᑦ ᐃᓅᓱᓐᓂᓴᐃᑦ ᐊᒻᒪᓗ ᐊᒥᓱᑦ ᐃᓅᓕᕐᑕᑐᑦ
ᓄᓇᕕᐅᑉ ᐃᓄᖏᑦ ᐃᓅᓱᓐᓂᓴᐃᑦ ᕿᑎᖃᓕᒫᖏᓐᓂᒃ ᐊᒥᓲᓂᕐᓴᐅᒪᑕ 26 ᐊᑖᓂ ᐅᑭᐅᓖᑦ. 3% ᑐᐃᓐᓇᐃᑦ 65 ᐅᖓᑖᓂ ᐅᑭᐅᓖᑦ, 75%-ᖏᑦ ᐃᓄᖏᑦᑕ ᓄᓇᕕᐅᑉ 35 ᐊᑖᓂ ᐅᑭᐅᓖᑦ.
ᓄᓇᕕᒻᒥ ᐃᓅᓕᕐᑕᑐᑦ ᐅᓄᕐᓂᐸᐅᖃᑕᐅᔪᑦ ᑲᓇᑕᓕᒫᒥ, 3.2 -ᓂ ᐊᑐᓂ ᐊᕐᓇᐃᑦ ᐱᐊᕋᕐᑖᓲᖑᑎᓪᓗᒋᑦ (ᑯᐸᐃᒃᒥ 1.6-ᖑᑎᓪᓗᒋᑦ). ᐊᕐᓇᐃᑦ ᐊᓈᓇᐅᓯᓲᑦ ᐊᕙᑎᓂᒃ ᐅᑭᕐᑖᖃᒻᒥᐅᓱᑎᒃ.
ᐊᕙᖕᖔᓗᒃ ᐱᓯᒪᕗᒍᑦ!
ᓯᕗᓪᓕᐸᐅᑦᓱᓂ ᐋᓐᓂᐊᓯᐅᕆᕕᑦᑖᕆᔭᐅᓚᐅᕐᑐᕕᓂᖅ ᐃᓄᑦᔪᐊᖅ 1948-ᖑᑎᓪᓗᒍ. ᐊᓯᖏᑦ ᑭᖑᓕᐅᔪᕕᓃᑦ ᑰᑦᔪᐊᖅ (1950)-ᒥ, ᐳᕕᕐᓂᑐᖅ (1960)-ᒥ, ᓴᓪᓗᐃᑦ (1961)-ᒥ, ᐊᒻᒪᓗ ᑰᑦᔪᐊᕌᐱᒃ (1962)-ᒥ.
ᐅᓪᓗᒥ ᓄᓇᓕᐅᓕᕐᑐᑦ ᓄᓇᓕᖕᖑᕙᓪᓕᐊᓯᓚᐅᕐᓯᒪᔪᑦ ᐃᓄᐃᑦ ᓄᓇᓕᒻᒥᐅᖑᖁᔭᐅᓕᕐᒪᑕ, ᑕᒪᓐᓇ ᓄᑖᖑᑦᓱᓂ ᐋᓐᓂᐊᓯᐅᕆᒍᑎᒃ ᓄᐃᓐᓂᒪᑦ, ᐃᓚᒌᖑᔪᓄᑦ ᐊᓂᕐᕋᓴᐅᔪᑦ ᓴᓇᔭᐅᖃᑦᑕᓕᕐᑐᕕᓃᑦ, ᓂᕿᑖᕈᑎᑖᕐᑕᓕᕐᓱᑎᓪᓗ.
ᑰᑦᔪᐊᑐᖃᖅ ᓅᑕᐅᔪᕕᓂᖅ ᓄᑖᒧᑦ ᐅᓪᓗᒥ ᓄᓇᕕᒋᓯᒪᓕᕐᑕᒥᓄᑦ, ᐊᒥᐊᔨᑲᐃᑦ ᐃᓂᕕᓂᖓ ᐅᒃᑯᐊᑕᐅᓚᐅᕐᓯᒪᔪᖅ ᐅᓇᑕᕐᓂᖅ 2 ᓄᖃᒪᑦ, ᑰᑦᔪᐊᖅ ᓄᓇᓕᖕᖑᓚᕆᑦᑐᕕᓂᖅ 1979-ᖑᑎᓪᓗᒍ.
ᒥᑭᔪᒥᒃ ᐋᓐᓂᐊᕕᑦᑖᓚᐅᕐᓯᒪᔪᖅ ᑲᕙᒪᒃᑯᑦ ᐃᓪᓗᖁᑎᖓᓂ ᑰᑦᔪᐊᒥ, ᐊᒻᒪᓗ ᑭᖑᓂᖓᒍᑦ ᑭᒍᑎᓕᕆᕕᑦᑖᒥᑦᓱᓂ.
ᐋᓐᓂᐊᓯᐅᕐᑏᑦ ᐊᒻᒪᓗ ᐳᕙᓪᓗᑐᖃᕐᒪᖔᑦ ᖃᐅᔨᓴᕆᐊᕐᑐᖃᑦᑕᓚᐅᕐᓯᒪᔪᑦ ᓄᓇᓕᓐᓂ ᐅᖓᕙᒦᑦᑐᓂ.
1975 : ᐊᑎᓕᐅᕐᑕᐅᓚᐅᕐᓯᒪᔪᖅ ᔭᐃᒻᔅ ᐸᐃ ᐊᒻᒪᓗ ᑯᐸᐃᑉ ᑕᕐᕋᖓᑕ ᐊᖏᖃᑎᒌᓐᓂᖓ ᑐᑭᓯᓐᓇᑎᑦᓯᓯᐊᑐᖅ ᐊᒻᒪᓗ ᐊᐅᓚᑦᓯᒍᑕᐅᔪᖅ ᑯᐸᐃᑉ ᑲᕙᒪᖓᑕ ᓄᓇᓕᑐᖃᑦᓴᔭᐃᑦ ᐱᔭᕆᐊᓕᖏᓐᓂᒃ ᐊᐅᓚᑦᓯᓂᐅᒋᐊᓕᓐᓂᓗ ᓄᓇᓂ.
ᑰᑦᔪᐊᑉ ᐋᓐᓂᐊᕕᖓ ᐊᐱᕆᓚᐅᕐᓯᒪᔪᖅ ᐃᓕᓐᓂᐊᕕᕐᔪᐊᑉ ᓚᕚᓪ ᐋᓐᓂᐊᕕᖓ ᐋᓐᓂᐊᕕᓕᐊᕐᕕᐅᓲᖅ ᐅᖓᕙᒥᐅᓄᑦ ᑎᑭᑎᑦᓯᓂᕐᓴᐅᖃᑦᑕᕋᔭᕐᒪᖔᑦ ᐋᓐᓂᐊᓯᐅᕆᔨᓂᒃ ᐱᓪᓗᑯᒋᐊᓕᓕᕆᔨᓂᒃ ᐊᕐᕕᑕᖃᑦᑕᓂᐊᕐᑎᓗᒋᑦ ᑕᕐᕋᒥ ᓄᓇᓕᓐᓄᑦ.
- 15 ᐃᓄᐃᑦ ᐋᓐᓂᐊᓯᐅᕐᑎᑐᐃᓐᓇᓂᒃ ᐃᑲᔪᕐᑎᓴᐃᑦ ᐱᒋᐅᕐᓴᑎᑕᐅᔪᕕᓃᑦ ᑰᑦᔪᐊᒥ.
- ᐃᓘᓐᓇᑲᓵᑎᒃ ᓄᓇᓖᑦ ᓄᓇᓕᖕᖑᑎᑕᐅᔪᕕᓃᑦ ᑯᐊᐳᕇᓴᖑᑎᑕᐅᑦᓱᑎᒃ.
- ᐅᖓᕙᒥ ᑐᓚᑦᑕᕕᒃ ᖃᓄᐃᖏᓯᐊᕐᓂᒧᑦ ᐋᓐᓂᐊᕕᐅᑉ ᓴᓇᔭᐅᓂᖓ ᐱᔭᕇᕐᑕᐅᔪᕕᓂᖅ ᓄᑖᒧᑦ ᐋᓐᓂᐊᕕᑦᑖᖃᒻᒥᒧᑦ ᓄᑦᑎᑎᓕᕐᑐᕕᓃᑦ
- 25-ᓂᒃ ᐃᓪᓕᓕᒻᒧᑦ
- ᐱᖓᓱᑦ ᐃᓄᐃᑦ ᐋᓐᓂᐊᓯᐅᓂᕐᒥᒃ ᐃᓕᓐᓂᐊᓱᑎᒃ ᐱᔭᕇᕈᑎᑖᕐᑐᕕᓃᑦ.
ᑐᓚᑦᑕᕕᒃ 800-ᓂᒃ ᐱᓇᓱᑦᑎᖃᓕᕐᑐᖅ. ᐱᓇᓱᐊᓲᑦ ᑰᑦᔪᐊᑉ ᐋᓐᓂᐊᕕᖓᓂ ᓄᓇᓕᓐᓂᓘᓐᓃᑦ 6-ᓂ ᐅᖓᕙᒦᑐᓂ.
