ᑐᓂᔨᓂᖅ ᐅᓐᓂᓗᒍᑎᓂᒃ

ᐱᑦᔪᔭᐅᔪᓕᒫᑦ ᐃᓗᓕᓯᓂᕆᕐᒥ ᐱᓇᓱᐊᕐᕕᐅᔪᓄᑦ ᐱᔪᓐᓇᐅᑎᖃᕐᖁᑦ ᖃᓄᐃᓗᕆᐊᖃᕈᓇᓱᑎᓪᓗ

ᐱᔪᓐᓇᐅᑎᓖᑦ ᐅᑯᓂᖓ:

• ᐱᑦᔪᔭᐅᒍᓐᓇᓱᑎᒃ, ᑲᒪᒋᔭᐅᓂᖃᑦᓯᐊᕆᐊᖃᕐᓱᑎᓪᓗ ᖃᓄᐃᑦᑐᒦᓐᓂᖓ ᐃᓗᓯᖓᑕ ᐃᑉᐱᒋᓗᒍ
•  ᓇᓪᓕᑳᒍᓐᓇᓱᑎᒃ ᐱᔪᓐᓇᐅᑎᓕᕐᑎᒍᑦ ᑲᒪᒋᔨᒋᒍᒪᔭᒥᓂᒃ ᐅᕝᕙᓗᓐᓃᑦ ᓇᓪᓕᐊᓂᒃ ᐱᓇᓱᐊᕐᕕᐅᔪᒥᒃ 
• ᐊᖏᕈᓐᓇᓱᑎᒃ ᑲᒪᒋᔭᐅᒍᑎᒥᓂᒃ ᐅᕝᕙᓗᓐᓃᑦ ᑕᐸᒍᓐᓇᓱᑎᒃ 
• ᐃᓚᐅᕕᖃᕈᓐᓇᑐᑦ ᑐᑭᑖᕋᓱᐊᕈᑎᐅᔪᓂᒃ 
• ᒪᓕᑦᑎᖃᕈᓐᓇᑐᑦ, ᐃᑲᔪᕐᑎᖃᕐᓗᑎᒃ ᑭᒡᒐᑐᕐᑕᐅᓗᑎᓪᓘᓃᑦ 
• ᐃᓂᑦᓴᖃᕆᐊᓖᑦ ᓯᓂᑦᑕᕕᖃᕐᓗᑎᓪᓗ 
• ᖃᓪᓗᓈᑎᑐᑦ ᐱᑦᔪᔭᐅᒍᓐᓇᓗᑎᒃ 
• ᐋᓐᓂᐊᓯᐅᕐᑕᐅᒍᑎᒥᑕ ᐊᓪᓚᑕᐅᒪᒍᓯᖏᓐᓂᒃ ᐊᑐᐃᓐᓇᖃᕈᓐᓇᑐᑦ 
• ᐋᓐᓂᐊᓯᐅᕐᑕᐅᒍᑎᖏᑦᑕ ᐊᓪᓚᑕᐅᒪᒍᓯᖏᑦ ᓇᒧᑐᐃᓐᓇᖅ ᐃᕐᐸᑎᑕᐅᒋᐊᖃᖕᖏᑐᑦ 
• ᐅᓐᓂᓗᒍᓐᓇᕕᓕᒃ 
• ᐱᔪᓐᓇᐅᑎᒥᓂᒃ ᐊᑐᕈᓐᓇᓯᐊᕆᐊᓕᒃ

ᖃᓄᐃᓗᕆᐊᖃᕈᓇᓂᖏᑦ ᐱᐅᓯᕆᒋᐊᓕᖏᑦᑕᓗ ᓂᕆᐅᒋᔭᐅᒍᑎᖏᑦ

• ᐃᓚᐅᕕᖃᕐᓗᓂ ᑲᒪᒋᔭᐅᒍᓯᕐᒥᓂᒃ, ᐱᑦᔪᔭᐅᒍᑎᒥᓂᒃ ᐊᒻᒪᓗ ᑲᑎᒪᔭᐅᓗᓂ ᖃᓄᐃᓘᕐᑕᐅᒍᑎᒋᒋᐊᓕᖓ ᐸᕐᓇᑕᐅᓕᕐᐸᑦ
• ᐊᑑᑎᑦᓯᐊᓗᓂ ᐊᖏᕈᑎᒋᓯᒪᔭᒥᓂᒃ ᑕᑯᔭᐅᖃᑦᑕᕆᐊᖃᕐᕕᒥᓂᓪᓗ
• ᑭᖕᖑᒪᒋᔭᒥᓂᒃ ᐅᖃᕈᓐᓇᓯᐊᕐᓗᓂ ᓂᕆᐅᒋᔭᒥᓂᓪᓗ ᑲᒪᒋᔭᐅᒍᓯᒋᓂᐊᕐᑕᒥᒍᑦ ᐱᑦᔪᔭᐅᒍᑎᒋᓂᐊᕐᑕᒥᒍᓪᓗ
• ᖃᓄᐃᓘᖃᑎᖃᑦᓯᐊᓗᓂ ᐱᓇᓱᑦᑐᓂᒃ
• ᐊᑐᐃᓐᓇᕈᕐᑎᓯᒪᑦᓯᐊᓗᓂ ᕿᒥᕐᕈᔭᐅᒍᑎᒋᓂᐊᕐᑕᒥᓂᒃ ᑲᒪᒋᔭᐅᒍᓯᒋᓂᐊᕐᑕᒥᓂᓪᓗ
• ᑐᑭᓯᑎᑕᐅᒍᒪᑦᓯᐊᖃᑦᑕᓗᓂ
• ᓲᓱᒋᔭᖃᑦᓯᐊᖏᓐᓇᓕᒫᕐᓗᓂ ᐱᓇᓱᑦᑎᓂᒃ, ᑲᒪᒋᔭᐅᔭᕐᑐᓯᒪᒻᒥᔪᓂᒃ ᐱᐅᒃᑯᑎᒋᔭᐅᔪᓂᓪᓗ
• ᓈᓚᑦᓯᐊᓗᓂ ᐋᓐᓂᐊᕕᐅᑉ ᒪᓕᒐᖏᓐᓂᒃ ᖃᓄᐃᓘᕆᐊᖃᕈᑎᖏᓐᓂᓗ
• ᖃᓄᐃᓘᓗᑲᒍᑎᖃᕐᑌᓕᓗᓂ ᐃᕐᐸᑎᕋᑦᓴᔭᐅᖕᖏᑐᓂᒃ ᐊᓯᒥᑕ ᑲᒪᒋᔭᐅᔭᕐᑐᓯᒪᒻᒥᔪᑉ ᐱᑦᔪᔭᐅᒍᓯᖏᓐᓂᒃ
• ᑐᓄᕓᓯᒪᑦᓯᐊᓗᓂ ᐱᖁᑎᒥᓂᒃ ᑎᓪᓕᑕᐅᖁᖕᖏᓗᒋᑦ, ᐊᓯᐅᖁᖕᖏᓗᒋᑦ ᓯᖁᒥᖁᖕᖏᓗᒋᓪᓗ
• ᐱᐅᓯᖃᑦᓯᐊᓗᓂ ᐊᑦᑕᓇᕐᑐᒦᑦᑌᓕᒍᓯᕐᓂᒃ ᐊᓯᒥᑕᓗ ᐊᑦᑕᓇᕐᑐᒦᑌᓕᒍᑎᑦᓴᖏᓐᓂᒃ
• ᐋᓐᓂᐊᕕᒻᒥᑦ ᐊᓂᒍᓐᓇᓗᓂ ᐋᓐᓂᐊᓯᐅᕐᑎᒧᑦ ᐊᓂᒍᓐᓇᓯᑎᑎᑕᐅᒍᓂ

ᖃᓄᐃᓘᕆᐊᖃᓂᖅ

ᑲᒪᒋᔭᐅᔭᕐᑐᓯᒪᔪᖅ ᖃᐅᔨᒋᐊᕐᕕᖃᕆᐊᓕᒃ ᑲᒪᒋᔭᐅᕕᐅᑉ ᐃᓗᐊᓂ ᑲᒪᓪᓚᕆᑦᑐᒥᒃ: ᑲᒪᒋᔭᐅᒍᓯᕐᓂᖅ ᐱᑦᔪᔨᒍᓯᐅᔪᓂᓪᓗ ᑲᒪᔪᒥᒃ, ᑐᑭᓯᒋᐊᕐᕕᒋᑦᓯᐊᓗᒍ ᖃᓄᐃᓕᖓᓂᐅᓯᒪᔫᑉ ᒥᑦᓵᓄᑦ ᐊᒻᒪᓗ ᐊᐱᕆᑦᓯᐊᓗᓂ ᑐᑭᓯᑎᑕᐅᒍᒪᓗᓂ

ᑐᓴᐅᒪᖃᑎᖃᕐᓂᖅ, ᐅᖄᖃᑎᖃᕐᓂᖅ ᑐᑭᓯᖃᑎᖃᕐᓂᖅ ᑲᒪᔨᐅᔪᒥᒃ ᐃᑲᔪᕐᓯᒍᓐᓇᑐᖅ ᐱᓀᓗᑕᐅᔪᖅ ᐋᕐᕿᖁᓪᓗᒍ

ᐱᓀᓗᑕᐅᔪᖅ ᐋᕐᕿᖏᑉᐸᑦ ᓂᕆᐅᒋᔭᖓᒍᑦ ᑲᒪᒋᔭᐅᔫᑉ, ᖃᐅᔨᒋᐊᕐᕕᖃᕆᐊᓕᒃ ᑐᓚᑦᑕᕕᐅᑉ ᐅᓐᓂᓗᒍᑎᓕᕆᔨᖓᓂᒃ ᐃᑲᔪᕐᑕᐅᒍᒪᓗᓂ

complaints.kuujjuaq@ssss.gouv.qc.ca
819 964-2905 ᓯᕙᓂᖓ 509

ᑲᒪᒋᔭᐅᔪᕕᓂᖅ ᓈᒻᒪᓴᖕᖏᑯᓂ ᑭᐅᔭᐅᒍᑎᕕᓂᕐᒥᓂᒃ ᐋᓐᓂᐊᕕᒻᒧᑦ ᐅᕝᕙᓗᓐᓃᑦ ᐃᓂᓪᓚᑕᐅᔪᕕᓂᕐᓂᒃ, ᖃᐅᔨᒋᐊᕐᕕᖃᕈᓐᓇᑐᖅ ᑯᐯᒻᒥ
ᐅᓐᓂᓘᑎᐅᓯᒪᔪᓂᒃ ᕿᒥᕐᕈᔨᒻᒪᕆᒻᒧᑦ:
1 800 463-5070
protecteurducitoyen.qc.ca

ᐱᐅᓯᐅᒥᑎᑦᓯᓂᖅ ᑲᒪᖏᔭᐅᒍᓰᑦ ᐱᑦᔪᔨᒍᑎᐅᔪᓪᓗ ᐱᑦᓯᐊᑑᒋᐊᖃᕐᓂᖏᓐᓂᒃ

ᑐᓚᑦᑕᕕᒃ ᑐᓴᕐᑎᑕᐅᒍᓂ ᖃᓄᐃᓕᖓᓂᕕᓂᐅᔪᒥᒃ, ᑲᒪᒋᔭᐅᔪᕕᓂᐅᑉ ᐅᕝᕙᓗᓐᓃᑦ ᓇᐅᑐᐃᓐᓇᐅᑉ ᓇᒻᒪᓴᕈᓐᓀᑐᕕᓂᐅᓂᖓᓂᒃ, ᐊᐅᓚᑦᓯᔨᖏᑦ ᐱᓇᓱᑦᑎᖏᓪᓗ ᐋᕐᕿᒋᐊᕈᑎᑦᓴᓂᒃ ᐊᐅᓚᑦᔭᕈᑎᖃᕆᐊᓖᑦ ᖃᓄᐃᓕᖓᓂᕕᓂᐅᔪᖅ ᐋᕐᕿᖁᓪᓗᒍ.

ᐱᒻᒪᕆᐅᓂᕐᐸᐅᑎᑕᖅ ᓯᕗᓂᕆᑦᓱᒍ ᐱᐅᓯᐅᒥᑎᑦᓯᒐᓱᐊᕐᓂᖅ ᑲᒪᒍᓯᐅᔪᓂᒃ ᐱᑦᔪᔨᒍᓯᐅᔪᓂᓪᓗ ᐅᓐᓂᓗᑦᑐᕕᓂᕐᓄᑦ ᐅᕝᕙᓗᓐᓃᑦ ᑲᒪᒋᔭᐅᒋᐊᓕᓕᒫᓄᑦ ᐃᓱᒫᓘᑎᖃᕋᔭᕐᐸᑕ ᓯᕗᓂᕐᒥ.

ᐋᓐᓂᐊᓂᓕᕆᓂᕐᒧᑦ ᐃᓄᓕᕆᓂᕐᒧᓪᓗ ᐱᖁᔭᖅ ᐱᕕᖃᕐᑎᓯᕗᖅ ᐃᓂᓪᓚᑎᕆᓯᒪᑦᓱᓂ ᑲᒪᒋᔭᐅᔪᑦ ᐃᓱᒪᒋᔭᒥᓂᒃ ᓄᐃᑦᓯᒍᓐᓇᖁᓪᓗᒋᑦ, ᑐᓴᕐᑕᐅᒍᓐᓇᖁᓪᓗᒋᑦ, ᑐᑭᓯᔭᐅᒍᓐᓇᖁᓪᓗᒋᑦ ᓲᓱᒋᔭᐅᑦᓯᐊᕈᓐᓇᖁᓪᓗᒋᓪᓗ.

ᓱᓀᓐᓈ ᐅᓐᓂᓗᒍᑎᓕᕆᔨ?

ᐅᓐᓂᓗᒍᑎᓕᕆᔨ ᐱᓇᓱᐊᓲᖅ ᐊᖏᕐᓯᒪᓂᒃᑯᑦ ᖃᐅᔨᒪᔭᐅᒋᐊᖃᖕᖏᑐᓂᒃ ᐃᕐᐸᑎᕆᔪᑦᓴᔭᐅᖕᖏᒋᐊᖅ ᐊᑦᔨᒌᑦᑎᓯᒋᐊᖃᕐᓂᒥᓪᓗ. ᑎᓕᔭᐅᒪᔪᖅ ᑲᑎᒪᔨᓄᑦ, ᑐᕃᓐᓇᑐᒥᒃ ᑐᓴᐅᒪᑎᑦᓯᔨᐅᑦᓱᓂ ᑲᑎᒪᔨᓂᒃ.

ᐱᑐᑦᓯᒪᖕᖏᑐᖅ ᐊᐅᓚᑦᓯᔨᐅᔪᓄᑦ ᐅᓚᐱᑕᐅᒋᐊᖃᕋᓂᓗ ᐱᓇᓱᐊᕐᑕᖏᓐᓄᑦ ᐃᕐᖃᑐᐃᓂᖃᕈᓐᓇᓂᖏᓐᓄᓗ. ᐅᓐᓂᓗᒍᑎᓕᕆᔨ ᑐᕃᓐᓇᑐᒥᒃ ᑐᓴᐅᒪᑎᑦᓯᓲᖅ ᑲᑎᒪᔨᓂᒃ ᓈᒻᒪᓯᑦᑕᑐᒃᑯᑦ ᐊᒻᒪᓗ ᑐᕐᖃᑕᕐᕕᒧᑦ ᐊᑕᐅᓯᐊᕐᓱᓂ ᐊᕐᕌᒍᒥ.

ᖃᓄᐃᓘᕈᑎᐅᔫᑉ ᐋᕐᕿᑕᐅᒍᓐᓇᓂᖓ

ᐅᓐᓂᓗᒍᑎᓕᐅᓚᐅᕋᓂ, ᑲᒪᒋᔭᐅᔪᕕᓂᖅ ᐱᕕᖃᕐᑎᑕᐅᔪᖅ ᖃᓄᐃᓘᕈᑎᕕᓂᐅᔪᒥᒃ ᐋᕐᕿᑕᐅᑎᑦᓯᒐᓱᐊᕐᓗᓂ ᐱᒍᑦᔨᕕᐅᑉ ᐱᓇᓱᑦᑎᖏᓐᓄᑦ ᐊᐅᓚᑦᓯᔨᖓᓄᓪᓘᓃᑦ

ᐅᓐᓂᓗᒍᑏᑦ ᐃᓕᖓᒍᓐᓇᑐᑦ ᐱᑦᔪᔨᒍᑎᓕᒫᖏᓐᓄᑦ ᑐᓚᑦᑕᕕᐅᑉ ᐃᓚᒋᔭᐅᑎᓪᓗᒋᑦ ᐋᓐᓂᐊᓯᐅᕆᓃᑦ ᐃᓄᓕᕆᓃᓪᓗ, ᐃᓅᓱᑦᑐᓂᒃ ᓴᐳᒻᒥᔩᑦ, ᑭᒍᑎᓕᕆᔩᑦ, ᐄᕐᖃᒐᓕᕆᔩᑦ ᐃᕐᓂᓱᑦᓰᔨᓪᓗ.

ᐅᓐᓂᓗᒍᑎᒃ ᐅᖃᐅᓯᒃᑰᕈᓐᓇᑐᖅ, ᑕᒃᑯᒧᑦ, ᐅᖄᓚᐅᑎᒃᑯᑦ, ᐊᓪᓚᓯᒪᔪᒃᑯᑦ, ᖃᕆᑕᐅᔭᒃᑯᑦ ᐊᓪᓚᓂᒃᑯᑦ ᐅᕝᕙᓗᓐᓃᑦ ᑐᓚᑦᑕᕕᐅᑉ ᑕᑕᕐᓴᒐᖓ ᐊᑐᕐᓗᒍ. ᐱᖁᔭᖅ ᒪᓕᑦᓱᒍ, ᐊᓪᓚᓯᒪᔪᕐᑎᒍᑦ ᐅᓐᓂᓘᑎᓕᐊᖅ ᑭᐅᔭᐅᒋᐊᓕᒃ ᐊᓪᓚᓯᒪᔪᕐᑎᒍ ᐅᓐᓂᓗᒍᑎᓕᕆᔨᒧᑦ.

ᓱᓇᐅᕚ ᕿᒥᕐᕈᔭᐅᒍᓯᖓ?

ᐅᓐᓂᓗᒍᑎᓕᕆᔨ ᕿᒥᕐᕈᓲᖅ ᖃᓄᐃᑦᑑᓂᖏᓐᓂᒃ ᐅᓐᓂᓗᒍᑎᐅᔪᑦ ᑲᒪᒋᔭᕕᓂᕐᒧᑦ. ᐃᑉᐱᓂᐊᕐᓂᓄᐊᖓᔪᑦ ᑲᒪᒋᔭᐅᓚᖓᖕᖏᑐᑦ.

ᐅᓐᓂᓗᒍᑎᑦᓯᐊᑦ ᓱᓕᔪᒥᒃ ᑐᖕᖓᓱᑦᑎᑕᐅᑦᓯᐊᑐᑦ. ᐃᑲᔪᕐᓯᒪᑕ. ᐱᐅᓯᐅᒥᑎᑦᓯᒍᑎᐅᒍᓐᓇᓱᑎᒃ ᐱᑦᔪᔨᒍᑎᐅᔪᓂᒃ ᐱᓇᓱᒍᓯᐅᔪᓂᓪᓗ.

ᕿᒥᕐᕈᓂᖅ ᑐᖕᖓᕕᖃᕐᑐᖅ ᓱᓕᑎᑦᓯᔪᓂᒃ ᐃᓱᒪᑖᕈᑎᐅᒍᓐᓇᑐᓂᒃ ᐱᕈᕐᐸᓕᐊᒍᑎᑦᓯᐊᖑᑦᓱᓂᓗ ᐃᓗᓐᓀᓄᑦ ᖃᓄᐃᓘᖃᑎᒌᑦᑐᓄᑦ:

• ᐃᑉᐱᒍᓱᓐᓂᖅ ᓇᒻᒥᓂᖅ ᐊᒻᒪᓗ ᓇᐅᑐᐃᓐᓇᐅᓗ ᑭᖕᖑᒪᒋᓪᓚᕆᑦᑕᖏᓐᓂᒃ ᐱᑦᔪᔭᐅᕕᒻᒥ
• ᓲᓱᒋᔭᖃᑦᓯᐊᓂᖅ ᓇᒻᒥᓂᖅ ᐱᑦᔪᔨᔨᐅᔪᓂᓪᓗ, ᐱᒍᓐᓇᕕᖃᕈᑎᖏᓐᓂᒃ ᐱᕕᖃᑦᓯᐊᖏᑦᑑᒍᑎᖏᓐᓂᓗ ᐱᓇᓱᐊᕐᕕᐅᑉ
• ᐊᑦᔨᒌᒐᓱᐊᑦᓯᐊᓂᒃᑯᑦ ᖃᓄᐃᓘᖃᑎᒌᓐᓂᖅ ᐋᕐᕿᐅᑎᒍᒪᓂᕐᒧᑦ ᐊᖏᖃᑎᒌᒐᓱᐊᕐᓂᒧᓪᓗ ᑕᐅᕐᓰᖃᑦᑕᐅᑎᓂᖅ ᐊᑐᑦᓯᐊᓗᒍ
• ᖃᓄᐃᓗᕆᐊᖃᕈᓯᒥᓂᒃ ᐊᑐᕐᓗᑎᒃ ᑕᒪᕐᒥᒃ
  

ᐅᓐᓂᓗᒍᑎᓕᕆᔨᐅᑉ ᓄᑭᖏᑦ ᐃᒫᙰᕈᑎᓕᐅᕈᓐᓇᓂᕐᒧᑦ

ᕿᒥᕐᕈᓂᕐᒥᓂ ᐅᕝᕙᓗᓐᓃᑦ ᐃᓱᓕᑉᐸᑦ, ᐅᓐᓂᓗᒍᑎᓕᕆᔨ ᐃᒣᒋᐊᓕᒃ 45 ᐅᓪᓗᐃᑦ ᐃᓗᐊᓂ:

• ᕿᒥᕐᕈᓂᒃᑯᑦ ᑐᑭᑖᕕᓂᕐᒥᓂᒃ ᖃᐅᔨᔭᐅᑎᑦᓯᓗᓂ ᐅᓐᓂᓗᑦᑐᕕᓂᕐᒧᑦ
• ᐃᒫᙰᕈᑎᓕᐅᕐᓗᓂ ᐋᕐᕿᕈᑎᐅᒍᓐᓇᓯᒐᔭᕐᑐᓂᒃ ᐱᐅᓯᐅᒥᑎᑦᓯᒍᑎᐅᓗᑎᒃ ᐱᑦᔪᔭᐅᒍᑎᖏᓐᓂᒃ ᑲᒪᒋᔭᐅᔪᑦᓴᔭᓕᒫᑦ
  

ᑲᓲᑎᑦᓯᐊᓂᖅ, ᑐᑭᑖᖃᑎᖃᑦᓯᐊᓂᖅ ᐃᒫᙰᕈᑎᓕᐅᕐᓂᓗ ᐱᐅᓯᐅᒥᒋᐊᕈᑎᐅᒍᓐᓇᑐᖅ ᐱᑦᔪᔨᑦᓯᐊᕈᑎᐅᒋᐊᓕᓐᓄᑦ ᓱᓕᓕᕐᑎᓯᓗᓂᓗ ᑲᒪᒋᔭᐅᔪᑦᓴᔦᑦ ᐱᔪᓐᓇᐅᑎᖏᓐᓂᒃ